Іван Васільеў у Мінску!

12 красавіка ў галоўных партыях – Жызелі і Альберта – у балеце А.Адана мы ўбачым двух заслужаных артыстаў – Беларусі і Расіі – Людмілу Хітрову і… Івана Васільева! Адзін з самых вядомых танцоўшчыкаў – Іван Васільеў у Мінску!

Нагадаем, гэты вечар Вялікі тэатр прысвячае заслужанаму дзеячу мастацтваў Рэспублікі Беларусь Аляксандру Калядзенку, беларускаму педагогу, які выхаваў не адно пакаленне зорак балета.

"З-пад крыла" Аляксандра Іванавіча вылецеў і Іван Васільеў: у свой час таленавіты малады чалавек вучыўся ў Беларускім харэаграфічным каледжы. У час вучобы Васільеў дэбютаваў на сцэне беларускага Вялікага, а пасля заканчэння каледжа быў прыняты ў трупу балета нашага тэатра, але неўзабаве быў запрошаны ў Вялікі тэатр Расіі. Танцоўшчыку спатрэбілася чатыры гады, каб стаць прэм'ерам вядучага тэатра.

Запрошаны саліст міланскага "Ла Скала", Баварскага балета, артыст, які выступаў з трупамі Марыінскага тэатра (Санкт-Пецярбург), Новасібірскага тэатра оперы і балета (НОВАТ), балетнай трупай Рымскай оперы, у 2015-м ён дэбютаваў як харэограф. У Міхайлаўскім тэатры, дзе ён быў прэм'ерам з 2011-га, Васільеў таксама выступіў у ролі пастаноўшчыка некалькіх цікавых спектакляў. З 2022 года Іван Васільеў - запрошаны саліст Міхайлаўскага тэатра (Санкт-Пецярбург).

Па просьбе настаўніка Васільева - Калядзенкі пастаноўшчык балета А.Адана "Жызэль" Ігар Колб, таксама вучань Аляксандра Іванавіча, запрасіў знакамітага артыста выканаць у гэты вечар на сцэне Вялікага тэатра Беларусі партыю Альберта. Гэта сапраўды будзе асаблівая вечарына: 12 красавіка Аляксандру Калядзенку спаўняецца 90 гадоў.