На сцэне – народныя і заслужаныя артысты, чые галасы даўно пакарылі сэрцы як беларускай публікі, так і гледачоў вядучых оперных пляцовак свету, – Настасся Масквіна, Аксана Волкава, Уладзімір Громаў, Андрэй Валенцій; а таксама маладыя салісты, ужо заявілі пра сябе ў сур'ёзных партыях, лаўрэаты міжнародных конкурсаў, многія з якіх паспяхова прадстаўляюць тэатр па-за межамі рэспублікі: Анастасія Міхнавец, Дар'я Гаражанка, Дзмітрый Шабеця, Аляксандр Міхнюк, Кірыл Панфілаў, Андрэй Мацюшонак. Балетная трупа працягне той жа крэатыўны дыялог пакаленняў. У тэатры Хо Гыом выступяць народны артыст краіны Антон Краўчанка, уладальнік медаля Францыска Скарыны Аляксандра Чыжык, вядучыя салісты балета Аліна Рудэнка, Канстанцін Белахвосцік, Уладзімір Руда і зусім маладая, але падаючая вялікія надзеі артыстка Ніка Скрабкова. У В'етнам адпраўляецца і Сімфанічны аркестр Вялікага тэатра Беларусі (дырыжор – народны артыст Рэспублікі Башкартастан Арцём Макараў, мастацкі кіраўнік Вялікага тэтра Беларусі).
У адміністрацыйна-творчай групе – вядучыя спецыялісты: мастацкі кіраўнік тэатра Арцём Макараў, галоўны рэжысёр, уладальнік медаля Францыска Скарыны Ганна Маторная, галоўны балетмайстар, заслужаны артыст Расійскай Федэрацыі Ігар Колб.
«У маштабнай канцэртнай праграме класіка (як оперная, так і балетная) суседнічае з сучаснасцю. Чайкоўскі і Глінка, Гуно і Рымскі-Корсакаў, Пучыні і Вердзі, Афенбах і Сен-Санс… Прагучыць музыка, знакавая для Вялікага тэатра Беларусі. Гэта веер стыляў і эпох. Спецыяльна для гэтага канцэрта Ігар Колб паставіў новы харэаграфічны нумар на музыку з оперы Глюка «Арфей і Эўрыдыка». Фінальным акордам стане знакамітая песня «Белоруссия» Пахмутавай і Дабранравава. Гэты твор даўно стаў адным з самых цёплых музычных сімвалаў нашай рэспублікі... – кажа галоўны рэжысёр Вялікага тэатра Беларусі Ганна Маторная. – Едзем з пачуццём глыбокай адказнасці. Гэта высокі гонар – выступіць на сцэне знакамітага опернага тэатра В'етнама. Можна сказаць, што мы выконваем культурную місію. Прадстаўляючы нашу краіну, мы дэманструем не толькі вышэйшы прафесіяналізм салістаў оперы і балета. Мы хочам, каб гледачы адчувалі: Беларусь – краіна з моцнай і глыбокай культурнай традыцыяй. Спадзяюся, выступленні ў маі стануць своеасаблівым творчым дыялогам паміж нашымі народамі».
Важна адзначыць, што для Вялікага тэатра Беларусі гэта першы цесны кантакт з в'етнамскай культурай за апошнія 30 гадоў.
На заметку
Дададзім, што 12 чэрвеня ў рамках фестывалю «Балетнае лета» ў Вялікім тэатры Беларусі адбудзецца гала-канцэрт «Шаўковая нітка», сумесны праект з В'етнамскім аркестрам традыцыйных інструментаў опернага тэатра Хо Гыом.